I HEART...

Tuesday, June 10, 2008

بوست تقيل ... وحشتوني


حبايبي وحشتووووووووووووني جدا جدا جدا؛؛


وحشتني كمان المدونة جدا جدا


وحشتني الكتابة جدا


بس نعمل


إييه



بصوا يا جماعة البوست ده من اولها اهوه بنقول بوست من العيار الثقيل زي ما بيقولوا .. لانه مليان كلام كثير ومواضيع كثير .. فاستحملوني بقى

شوية ظروف على شوية مذاكرة على شوية انشغالات كده -- محتاجين فيها دعواتكم -- وعلى شوية حاجات كده برده لكن الحمد لله رجعت من تاني واحب اطمن كل من اتصل وبعت ايميلات انا بخير والحمد لله وعايش اهوه بفضل الله ومنته وبتنفس كمان الحمد لله .. في حين ان غيرنا مش عارف لا يعيش ولا حتى يتنفس في بلدنا وفي بلادنا هتقولولي ازاي هقلكم في بلدنا مصر وفي بلادنا اللي هي الدول العربية المغتصبة .. والله يا جماعة الواحد لما يقعد يفكر في اللي بيحصل ده ويتابع بيحس انه على عاتقه هم كبير وهم ما يتلم .. وفي وسط الضلمة دي تلاقي ربنا فتحلك طاقة نور لما تلاقي المجاهدين في كل مكان رافعين راية الاسلام لأخر قطرة دم فيهم ولما تلاقي في ارض الرباط - فلسطين - الشهيد تلو الشهيد والشهيدة تلو الشهيدة والعزة في عز الحصار والظلام الدامس الذي يعيشه قطاع غزة ولكن العزة لله وللمجاهدين .. عجبتني اوي فكرة عملية نذير الانفجار واثر فيه جدا كلام احد منفذي العملية وهو يقرأ وصيته وشوية يدمع وشوية يضحك ألا وهو الشهيد الحي زي ما عرف نفسه الشهيد الحي بإذن الله " أحمد أبو سليمان " وكنيته ابو خطاب فقد إرتقى الى ربه شهيدا وان من كرامة هذا الشهيد أن حفرت على احدى يديه لفظ الجلالة واضحة عند نزوله القبر أما بقى العجب العجاب اللي وقفت قدامه كده وتنحت وما بقتش عارف لا اتكلم ولا اعيط ولا افرحله ولا اي شئ اني لاقيت عمره لا يتجاوز ال22 سنة يعني تقريبا متوسط اعمار معظم المدونين وهو احدافراد القوة الخاصة لكتائب عز الدين القسام ..بجد حسسني بالعجز وحسسني باني جنبه مش حاجة .. بس بعدها تمنيت من ربنا سبحانه وتعالى الشهادة ... واتمنيت ان الحدود العربية اللي بين كل البلاد المسلمة العربية تزول وتندحر ونبقى سيف واحد على قلب رجل واحد ونزود عن مسرى نبينا الحبيب صلى الله عليه وسلم ... وفي النهاية اسيبكم تدعوا ربنا بجد انه يفتح الحدود لنزود عن ارضنا الحبيبة ارض الرباط فلسطين .. واليكم لينك الفيديو بتاع الشهيد أحمد ابو سليمان احد منفذي عملية نذير الانفجار
أما بقى الفترة اللي فاتت وما تناولته من احداث .. فأحب اقلكم اني أكثر حاجة كانت مضايقاني هي حاجتين موضوع انه مكتب الارشاد يتعين فيه خمسة اعضاء ولا ما يتعينش والناس تطلع تتكلم والصحافة تقول ان القيادة نفت ويطلع أحد الصحفيين ويكتب مقاله الشهير في الدستور واللائحة بتاع الجماعة و غيره وغيره مما قاله في مدونته او ما قيل في مدونات اخرى تتبع الاخوان او غيرهم والي بيطلع ينقد ويجرح وعمر ما جماعة الاخوان عرف عنها انها بتتبع هذه السياسة من اساسه والصحافة تاخد من كلام ده ومن كلام ده على اساس انه من مدوني الاخوان وانه فلان قال وفلان عاد ... بصراحة انا مش فاهم هو ايه اللي مضايق كل الناس في الموضوع ده دي حاجة خاصة بالاخوان عامة ومكتب الارشاد خاصة وقد ايه عجبني الدكتور / محمود عزت لما طلع وقال انهم عينوا خمسة اعضاء جدد و قال انها كانت غير معلنة علشان عدم استفزاز الامن .. يعني الراجل مش عايز يستفز الامن والصحافة عايزة الاخوان تستفز الامن ولا ايه حد يفهمني .. المهم بس انا عايز اسال سؤال هو لو حد فينا في بيته مثلا وجاله عريسين في وقت واحد لاثنين من بناته لازم الناس كلها يبقى عندها علم والصحافة تقول ده فلان جه لبناته عريسين .. ومانشيت ينزل في احدى الصحف اللي ظاهرها انها معارضة الحق خبطة الموسم فلان بيفكر انه يغير الانتريه وبيفكر كمان ان عدد افراد الاسرة يزيدوا لان عريس جديد اتقدم لبنته وان كده عدد الاسرة اصبح 12 .. بالله عليكم ينفع ده يحصل أو حد يقبله لا طبعا .. بس اهو بقى ده اللي حصل واللي بيحصل ..لكن انا اقصدي من كل الكلام ده انه حاجة عادية يعني لما الجماعة تعين خمسة ولا متعينش دي حسب رؤيتها وحسب احتياجه وبعدين هي مش بفلان او غيره هي بتاعة ربنا وربنا هو اللي بيمشيها ودي اجتهادات بشر تخطئ وتصيب .------- أما بقى الموضوع التاني هاسيبه للبوست اللي جاي .. ومستني رايكم وردودكم وبحمد ربنا اني رجعتلكم تاني .. يلا بقى مستني دعواتكم

18 comments:

mo'men mohamed said...

السلام عليكم
أسال الله ان يقبضنا شهداء فى سبيله

اما عن مكتب الإرشاد
فالطفيليات عددها بالبلايين

وبعدين من امتى كانت اسرار الجماعة الأخبار تتداولها تتناقلها

الإخوان جماعة محظورة و شرف لها ذلك
لذا عليها أن تبقى حذرة طول الوقت
السلام عليكم

غاوي حرية said...

وعليكم السلام ورحمة الله وبركاته
د/ مؤمن
*********
اهلا ومرحبا بيك في المدونة ونورت يا دكتور .. اللهم آمين يا فندم .. اما بقى عن كون جماعة الاخوان محظورة ام لا فهي غير محظورة بحكم المحكمة الدستورية العليا بذلك ولكن هذه الكلمة استخدمها ألمن لتشويه صورة الاخوان وترسيخها في ادمغة الشعب ولكن لا يفلح الله كيد الظالمين .. ولا رايك ايه ..وفعلا شرف لها ذلك وفعلا يجب ان تظل حذرة لاخر قطرة دم من اخر رجل فيها

elbostagy2 said...

السلام عليكم ورحمة الله وبركاته

اللهم استخدمنا لنصرة دينك ولا تستبدلنا ،،؛

اللهم اقبضنا شهداء في سبيلك ..

بخصوص الجزء الأخير من المقال ..

النقد الذاتي دليل على حيوية الجماعة ..
بل أنه من أصح النظم الادارية فاعلية

لكنني أختلف أن يكون على صفحات الجرائد
أو أن نصوره على أنه صراع بين الرس الجديد والحرس القديم

النقد الداخلي له من آليات الاتصال والتواصل العديد من الطرق التي لا تخفى عن أي من العاملين بالصف

أما أن يصبح سجالا على صفحات الجرائد .. فتلك هي المهزلة ممن نصبوا أنفسهم متحدثين باسم الاخوان ،،؛

محاولة لكسر الصمت said...

أولا حمد الله على السلامة....ثانيا يارب يدخل كل شهداؤنا الفردوس الأعلى ويجعلهم شفعاء لأهلهم ..ويارب كمان يحققلك كل أمنياتك اللي قلت عليها....بس كان فيه حاجة عايزة أقولها...إنت ليه بتتمنى الشهادة....عارفة إن الشهادة مرتبة عظيمة جدا....بس انت ممكن تاخد ثوابها بطريقة تانية ويمكن كمان ثواب أكبر من ثوابها.....لأنه هيكون الجهاد الأكبر زي ما الرسول (صلى الله عليه وسلم) قال....يعني انت لما تعمر بلدك وتوقفها على رجليها أكيد ده عند ربنا ثوابه كبير جدا....عموما ربنا يوفقك وتقدر تخدم البلد دي بجد عشان هيا محتاجاك أوي....
أما بالنسبة لموضوع الاخوان ده فبصراحة انا اول مرة اسمع منك بس بصراحة اكتر انا مابقتش احط في بالي اوي الاخبار المملة بتاعة الاخوان عملوا والاخوان سووا....عشان كله كلام في كلام واحنا عندنا اجدع ناس تتكلم....

غاوي حرية said...

البوسطجي باشا
*************
حبيبي في الله نورت مدونتي يا ريس .. يا رب تقبل دعائك يا جميل ويقبلنا من الشهداء مخلصين له الدين ... ووالله كلامك ده عين العقل وده رأيي بالفعل ومتهيالي انها مسالة انفس وربنا يثبتنا ويثبتكم يا ريس ويثبت من يشاء وربنا يستخدمنا ولا يستبدلنا يارب .. وفي رأيي الجماعة اكبر شموخا وعزة بالله من هذه الارهاصات فهي لا تعرف ابدا طريقا للتجريح والخوض في احد كما يفعل البعض الان .. فاللهم تب علينا وعلى كل المسلمين

غاوي حرية said...

دواير
*******
نورتي وعودا حميدا وعقبال النتيجة .. اما بقى في كلامك فانتي عندك حق بس ايه رايك في واحد طماع عايز الاثنين في وقت واحد عايز ثوابها واكبر منها وعايزها هي كمان .. متهيألي ده مش طمع لان مفيش في الحسنات طمع فايه المانع ان الواحد يحاول يعمل لنصرة الدين وهو يدعوا الله بان يستخدمه ولا يستبدله وفي نفس الوقت يتمنى ان يموت شهيدا متهيألي اني دي عين المتاجرة مع الله وده كان حال الصحابة ويا ريت نبقى مثل الصحابة .. يا ريت .. وبعدين البلد مش محتاجاني انا وبس دي محتاجة كل واحد بيفهم وواعي وعايز يخدم دين ربنا في ارضه صح يعني محتاجانا كلنا ... اما بقى رايك في الحتة الاخيرة من البوست الخاصة بموضوع الاخوان فانا احترمه جدا بس عايز اقلك حاجة عمر ما كان الاخوان كلام وخلاص ولكن الاعلام هو اللي صدع دماغ العالم والشعب بالاخوان عملوا والاخوان سووا لان النظام بصريح الكلام خايف من تقدم الاخوان اي خطوة لانها ضد مصلحته لذلك كان كل ما كان في حق الاخوان من اعتقالات وتعذيب ومحاكمات عسكرية واخرها المحاكمة الاخيرة .. واكيد كل الشعب يسمع عنها .. وفي النهاية نتفق في مااتفقنا عليه ويعذر بعضنا البعض في ما اختلفنا فيه ..دمتي بكل خير

paranoia,magnetic & dramatic girl said...

حمد الله علي سلامتك
يارب تكون احسن من اي وقت
..
بوست جمييييييل لانه شامل حاجات كتير وكفاية اوي انه طمنا عنك
سبحان الله يارب يكرمنا بالشهادة او حتي باننا نعمل اي حاجة خير
الكلام عن الاخوان مش هينتهي ودايما هيخلوهم تحت المجهر
ربنا يعين ويحفظ من كان منهم علي حق نبيه عليه الصلاة والسلام

تحياتي
.
دودو

paranoia,magnetic & dramatic girl said...

نسيت اقلك المقطع الصوتي الي واضعه جميل اوي
ربنا يكرمك
..
دودو

محاولة لكسر الصمت said...

أولا الله يسلمك وعقبال نتيجتك ان شاء الله...
ثانيا لو الطمع بيبقى كده ياريت الناس كلها تبقى طمااااااعة زيك كده..
ثالثا ..على فكرة أنا كلمة (كلام في كلام) دي ما كانش قصدي عليها الاخوان....أن قصدي الدوشة اللي بتتعمل على كل حاجة...
ومع ذلك برضه فأنا ليا تحفظات على حجات كتير بيعملوها الاخوان...
بس زي ماقلت نختلف ونتفق...
...........ويارب تنورني دايما

غاوي حرية said...

paranoia,magnetic & dramatic girl
دودو
***********************************
السلام عليكم .. الله يسلمك يا فندم والحمد لله انا بخير وربنا يعزك على الاطراء وربنا يا رب يتقبل منا ومنكم ويرزقنا شهادة ترضيه عنا .. فاللهم آمييييين .. انا بقى بخصوص المقطع فهو فعلا مقطع مالوش حل من وجهة نظري وانا بحبه جدا ... نورتيني يا فندم ودمتي بكل خير

غاوي حرية said...

دواير
******
سعدت بوجودك مرة تانية .. ونورتي المدونة يا فندم وشكرا على توضيحك وزي ما قلت نتفق في ما اتفقنا فيه ويعذر بعضنا البعض في ما اختلفنا فيه .. لكن في الاول وفي الاخر احنا مسلمين زي بعض بنحب مصلحة دينا وبنخاف عليه وبننشره .. وان شاء الله هتلاقيني عندك دايما .. سلامووز

ماجد العياطي said...

لو كان الرصاص ليه قلب
ماكانش يدخل جسم الشهيد
لكن حكمت ربنا
لازم الشهيد يفضل شهيد

Anas said...

الحمدلله ع سلاآآمتكـ

وانت وحشتنا كماآن


بصراحة ، انا ملياش في الكلام بتاع الاخوان ده

يااارب يكوون بعونهم يااارب ويصبرهم

ويريهم الحق حقا ويرزقهم اتباعه ويريهم الباطل باطلا ويرزقهم اجتنابه



الحمدلله ع سلاامتكـ


سلاآآم

غاوي حرية said...

ماجد العياطي
************
صدقت والله يا اخي .. لازم الشهيد يفضل شهيد .. هذا قدره وهذا ما كتب له ... فاللهم اكتبنا من الشهداء

غاوي حرية said...

Anas
*******
نورت يا ريس وجوزيت خيرا على اهتمامك يا ريس وربنا يبارك فيك

ريمان said...

السلام عليكم

انا سعيده والله جدا ان حضرتك نورت مدونتى وزورتها

وسعيده اكتر انى زورت مدونتك

مدونتك دمها خفيف ولذيذه

استمر

ربنا يوفقك
تحياتى

ريمان

نوسه وريمان فى هاكونا مطاطا said...

اه
حبيت برده اعلق عند حضرتك بمدونتى الجديده
هى مدونه مشتركه بينى وبين الاخ حسام يحيى صاحب مدونه صوت الحريه

احنا لسه بادئين والمدونه تحت الانشاء

ومفيش مانه لو تشجعنا

نبقى شاكرين افضال حضرتك

تحياتى

ريمان

بحب كل الناس said...

السلام عليكم اخى واحبيبى
مشى عارف اعبر عن احساسى بس اللى اقدر
اقولة
هو ان المقال شديد جدا
وربنا يقويك ياباشا

ويزيدك كمان وكمان

ويوفقك الايام القادمة


اخوك الصغير

ميرو