كل سنة وانتي طيبة يا مدونتي

يااااااااااا الله .. بجد مش مصدق انه مر على مدونتي التي استقريت عليها بعد كذا مدونة قبلها ... عام كامل .. مش مصدق عام كامل بصولاته وجولاته وزواره و تعليقات ومناقشات واصحاب جديدة وافكار اكثر وناس استفدت منهم وبقيت ازورهم ويزورني في مدوناتنا .. لكم تعلمت من هذا العالم الغريب .. بجد يا جماعة انا بحب التدوين جدا وان كنت مقصر شوية لكن بجد السنة اللي فاتت دي مليئة بالاحداث الكثير التي عكرت صفوي في ان اكتب واحرر واتابع واناقش واغطي ما يحدث من احداث .. ولكنه مضى بمره وحلوه و لكن أسأل الله تعالى ان يتقبل مني ومنكم .. وان يجمعني واياكم في فردوسه الاعلى .. آميييييييين يا رب .. وبجد انا سعيد جدا اني عرفت ناس كثير من هذا العالم التدويني الرائع ان استخدم بصورة صحيحة .. بجد بجد مش قادر اوصف فرحتي واليكم مدوناتي السابقة

حريتنا ... لشباب غاوي حرية ودي كانت بدايتي انا والمدون الحبيب عمرو سلامة صاحب مدونة لسه عايش صرخــــة ودي كانت تجربتي الثانية .... وبعدها دخلت في مرحلة عدم الاستقرار .. فقلت اعمل واحدة عاطفية وواحدة عامة ثم استقريت اني اعمل غاوي حرية اللي عيد ميلادها التدويني النهاردة.. والمدونة العاطفية اسمها

حكاية حب

بس بجد مدونة من الاخر .. ودي الجانب العاطفي في حياتي

وبعد هذا كله احب اقلكم عام سعيد وكل عام وانا وانتم الى الله اقرب وعلى طاعته ادوم

بوست عاطفي شوية

يا صاحبة المشاعر الرقيقة .. بك أحيا .. عذرا لقد فضحني قلبي حينها لم أستطع أن ألزمه السكوت فحبي لكي هو عين الحقيقة إني أذكر كل ما مضى بالثانية والدقيقة وقتها كنتي معي أينما كنت بفكري .. بعقلي .. بقلبي .. بدمي فقد كنت أحس بدقات قلبك .. أحس بحبك .. بهمسك .. بنظراتك .. آيااااااا حلم تمنيته .

أذكر أول لقاء من الألف إلى الياء حينها تميزتي من بين الحضور برشاقة قوامك وانسيابك وعذوبة صوتك وسحر عيونك تميزتي بأجمل ما فيكي وهو حيائك يا ارق وأجمل الحضور .. لقد كنت اراقبكي واسرق النظر إليكي و أتتبع خطواتك فأستنشق عبق عطرك وأناجي قلبكي .. فأداعب مكان تواجد كي فقد كنت بلا إرادة أجد نفسي حواليكي .. أتمنى أن يلامس كفيكى ... فأنا لم اعد أحس بالحضور ، عندما تلتفين نحوي وتلتقي عينك بعيني يسحرني بريقها .. تأسرني أحداقها وتعصف بي أهدابها .. إذا إبتسمتي أرى اشراقة شمس الصباح ويكأنكي وردة من بين الورود تفوح بعطرها الفواح .. إذا مشيتي من بين الحضور أتلفت إليكي ويكأنكي ملاك من الحور .. أذا تحدثتي أو إبتسمتي أو حركتي أطرافك فالمكان بالكامل يهتز وترقص أركانه طربا ... آياااااا حلم تمنيته

. أتذكر يومها عندما تقدمتي نحوي ووقفتي أمامي وسألتني لماذا تلاحقني بنظراتك ؟؟ ماذا تريد ؟؟ .. لكني حينها وقفت أمامك في ذهول وقد احمر وجهي خجلا و ارتعشت يداي وتصبب راسي عرقا .. لا اعرف ماذا أقول !!!! ... حينها تبسمتي ومن هنا بداية الحكاية .. وأي حكاية .. فهذه حكايتي يا دمعة نزلتي من عيني

.
أنا

حياتي كلها لله ... هي ايه الحكاية

حياتي كلها لله .. ولا مولى لنا الاه .. احب الله جل علاه ومن حبي له ....

الموضوع وببساطة شديدة انه في فريق اسمه حياتي لله .. وابتدأ من فترة صغيرة جدا .. بس بسم الله ما شاء الله فيه اقبال كبير من الشباب للمشاركة والعمل فيه .. الفريق ده ابتدا بتجمع 9 اعضاء من محبي الداعية مصطفى حسني وقالوا تعالوا نتجمع تحت الشعار ده ونحاول نحققه وحطوا اهداف للفريق ده وحطوا خطة زمنية والفريق بدا يكب ويكبر ويكبر وكل ده بفضل الله تعالى وبفضل مجهود شباب وبنات الفريق ... بصراحة الفكرة عجبتني أووي وبتحقق حاجات كثير الواحد كان محتاجلها منها الصحبة الصالحة العمل لدين الله باساليب مختلفة .. هي مش جديدة بس مبتكرة وفيه اضافات جامدة فقلت بلاش أستأثر بالمعرفة لوحدي واجي أقلكم لعلكم تستفيدوا وتعجبكم الفكرة زي العبد لله وتشاركونا الحلم ده وتشتركوا معانا في الفريق ده عشان نمشي مع بعض في طاعة الله وتحت مظلة العمل لله ... هتقولولي ايه الفرق بينه وبين اي فريق خيري او اي جمعية خيرية هقلكم انه الفريق ده بيفكر انه يكون افضل واقوى الفرق الخيرية على الساحة وده لينك الجروب بتاع الفريق على الياهووhttp://groups.yahoo.com/group/7yate_allah/ للي عايز يشترك فيه وده لينك المدونة الرسمية ( الصوت الاعلامي ) لفريق حياتي للهhttp://hayatyforallah.blogspot.com/ للي عايز يعرف اي حاجة عن الفريق .. بلا ادخلوا واعرفوا كل شئ عن الفريق وقولولي عجبتكم الموضوع ولا لا ... يلا مستنيكم يا حبايبي

بوست تقيل ... وحشتوني

حبايبي وحشتووووووووووووني جدا جدا جدا؛؛

وحشتني كمان المدونة جدا جدا

وحشتني الكتابة جدا

بس نعمل

إييه

بصوا يا جماعة البوست ده من اولها اهوه بنقول بوست من العيار الثقيل زي ما بيقولوا .. لانه مليان كلام كثير ومواضيع كثير .. فاستحملوني بقى

شوية ظروف على شوية مذاكرة على شوية انشغالات كده -- محتاجين فيها دعواتكم -- وعلى شوية حاجات كده برده لكن الحمد لله رجعت من تاني واحب اطمن كل من اتصل وبعت ايميلات انا بخير والحمد لله وعايش اهوه بفضل الله ومنته وبتنفس كمان الحمد لله .. في حين ان غيرنا مش عارف لا يعيش ولا حتى يتنفس في بلدنا وفي بلادنا هتقولولي ازاي هقلكم في بلدنا مصر وفي بلادنا اللي هي الدول العربية المغتصبة .. والله يا جماعة الواحد لما يقعد يفكر في اللي بيحصل ده ويتابع بيحس انه على عاتقه هم كبير وهم ما يتلم .. وفي وسط الضلمة دي تلاقي ربنا فتحلك طاقة نور لما تلاقي المجاهدين في كل مكان رافعين راية الاسلام لأخر قطرة دم فيهم ولما تلاقي في ارض الرباط - فلسطين - الشهيد تلو الشهيد والشهيدة تلو الشهيدة والعزة في عز الحصار والظلام الدامس الذي يعيشه قطاع غزة ولكن العزة لله وللمجاهدين .. عجبتني اوي فكرة عملية نذير الانفجار واثر فيه جدا كلام احد منفذي العملية وهو يقرأ وصيته وشوية يدمع وشوية يضحك ألا وهو الشهيد الحي زي ما عرف نفسه الشهيد الحي بإذن الله " أحمد أبو سليمان " وكنيته ابو خطاب فقد إرتقى الى ربه شهيدا وان من كرامة هذا الشهيد أن حفرت على احدى يديه لفظ الجلالة واضحة عند نزوله القبر أما بقى العجب العجاب اللي وقفت قدامه كده وتنحت وما بقتش عارف لا اتكلم ولا اعيط ولا افرحله ولا اي شئ اني لاقيت عمره لا يتجاوز ال22 سنة يعني تقريبا متوسط اعمار معظم المدونين وهو احدافراد القوة الخاصة لكتائب عز الدين القسام ..بجد حسسني بالعجز وحسسني باني جنبه مش حاجة .. بس بعدها تمنيت من ربنا سبحانه وتعالى الشهادة ... واتمنيت ان الحدود العربية اللي بين كل البلاد المسلمة العربية تزول وتندحر ونبقى سيف واحد على قلب رجل واحد ونزود عن مسرى نبينا الحبيب صلى الله عليه وسلم ... وفي النهاية اسيبكم تدعوا ربنا بجد انه يفتح الحدود لنزود عن ارضنا الحبيبة ارض الرباط فلسطين .. واليكم لينك الفيديو بتاع الشهيد أحمد ابو سليمان احد منفذي عملية نذير الانفجار

أما بقى الفترة اللي فاتت وما تناولته من احداث .. فأحب اقلكم اني أكثر حاجة كانت مضايقاني هي حاجتين موضوع انه مكتب الارشاد يتعين فيه خمسة اعضاء ولا ما يتعينش والناس تطلع تتكلم والصحافة تقول ان القيادة نفت ويطلع أحد الصحفيين ويكتب مقاله الشهير في الدستور واللائحة بتاع الجماعة و غيره وغيره مما قاله في مدونته او ما قيل في مدونات اخرى تتبع الاخوان او غيرهم والي بيطلع ينقد ويجرح وعمر ما جماعة الاخوان عرف عنها انها بتتبع هذه السياسة من اساسه والصحافة تاخد من كلام ده ومن كلام ده على اساس انه من مدوني الاخوان وانه فلان قال وفلان عاد ... بصراحة انا مش فاهم هو ايه اللي مضايق كل الناس في الموضوع ده دي حاجة خاصة بالاخوان عامة ومكتب الارشاد خاصة وقد ايه عجبني الدكتور / محمود عزت لما طلع وقال انهم عينوا خمسة اعضاء جدد و قال انها كانت غير معلنة علشان عدم استفزاز الامن .. يعني الراجل مش عايز يستفز الامن والصحافة عايزة الاخوان تستفز الامن ولا ايه حد يفهمني .. المهم بس انا عايز اسال سؤال هو لو حد فينا في بيته مثلا وجاله عريسين في وقت واحد لاثنين من بناته لازم الناس كلها يبقى عندها علم والصحافة تقول ده فلان جه لبناته عريسين .. ومانشيت ينزل في احدى الصحف اللي ظاهرها انها معارضة الحق خبطة الموسم فلان بيفكر انه يغير الانتريه وبيفكر كمان ان عدد افراد الاسرة يزيدوا لان عريس جديد اتقدم لبنته وان كده عدد الاسرة اصبح 12 .. بالله عليكم ينفع ده يحصل أو حد يقبله لا طبعا .. بس اهو بقى ده اللي حصل واللي بيحصل ..لكن انا اقصدي من كل الكلام ده انه حاجة عادية يعني لما الجماعة تعين خمسة ولا متعينش دي حسب رؤيتها وحسب احتياجه وبعدين هي مش بفلان او غيره هي بتاعة ربنا وربنا هو اللي بيمشيها ودي اجتهادات بشر تخطئ وتصيب .------- أما بقى الموضوع التاني هاسيبه للبوست اللي جاي .. ومستني رايكم وردودكم وبحمد ربنا اني رجعتلكم تاني .. يلا بقى مستني دعواتكم