مش عارف ابدأ منين ولا اقووول ايه ؟؟
بس الموضوع بقى شئ أصبح طقس للشعب المصري بعد كل ما يمارس عليه من تجارب وضغوطات وتعذيب ليلا ونهارا من أول ما تصحى من نومك لحد ما تنام ويا بختك الاسود لو اتاخدت تحري ككمالة عدد عشا اسلوب كلامك مش عجب البيه الظابط ابو دجاجة على كتفه .. وروحت بيتلك ليلة في التخشيبة واتروقت مثلا واتعملك حفلة ولا حاجة ويا عيني عليك لو كلت التورتة وبعد كه تخرج وانت ملكش ذنب في اي حاجة ولو بقى كان شكلك مش عجب البيه ابو دجاجة برده ولفقلك قضية ومحدش يعرفلك صاحب واتحبست وعيشت معنى ياما في الحبس مظاليم .. بلاش كده تعالى مثلا لو مش حصلك كده هتلاقي نفسك من صباحية ربنا وانت بتقول يا فتاح يا عليم يا رزاق يا كريم
والدنيا تشيلك وتحدفك ولو هبدتك عادي يعني ويدوب تيجي تاخد نفسك تلاقيك دخلت في حاجة تاني .. مفرمة يا ولداه كله بيتفرم فيها من صباحية ربنا لبليل
وفي عز ما المفرمة شغالة على كيف كيف اللي بيدوس على الزرار عشان يفرم الناس عشان ما يبقوش شايفين ولو شافوا ما يبقوش حاسين ولو حسوا ما يبقوش قادرين انهم يقولو حتى آآآآه مش لأ ... تلاقي البيه بتاع الزرار هو واللي بيخليهم يساعدوه - عشان يدوسوا معاه على الزرار عشان الناس تتفرم أكثر واكثر - لو حد جه يثور على الوضع ده وعاوز يطلع برة المفرمة ايا كان اسلوبه سلمي ولا غير سلمي اصلاحي ولا غير اصلاحي تلاقيه على طول وقفله اسطول حربي من عساكر الامن المركزي عشان يأدبوا هؤلاء الخارجون على القانون الذي يريد ان يسيروا على هواه ويكأن ليس هناك بشر يعيشون معه في هذه البلد ...ورغم كل ذلك وجد الشعب المصري - ليس كل الشعب - وانما بعض شبابه الذين يحبون هذا البلد ويريدون ان يحيوا حياة كريمة بلا ظلم ولا تزوير ولا توريث غير مشروع ولا اهانة ولا ولا ولا سوى ان يعيشوا في بلدهم حياة آمنة مستقرة تملأها الديمقراطية والحب والوفاء لهذا الوطن ليعبروا عن رأيهم بداية من الفتاة التي تم اعتقالها العام الماضي وقامت الدنيا ولم تقعد لكي تخرج هذه الفتاة هم شباب 6 ابريل يوم الاضراب الذي تكرر للمرة الثانية على التوالي بإستعدادات أمنية غشيمة لإجهاضه بدون اي خطوط حمراء .. ولكن لو تحدثنا عن انتهاكات الامن التي باتت معروفة لدى اصغر عيل في بلدنا الحبيب لن نصمت من كثرتها ...ولكن
هل نجح إضراب 6 أبريل لعام 2009 ؟
على الاقل رأينا أناس لا ينتمون لاي تيار لديهم الغيرة على بلدهم والرغبة في التغيير للأفضل
