ابتسم انت في بلد ديمقراطي
من كام يوم كده كنت في مشوار ناحية الجيزة وفجأة ركبت ميكروباص ولاقيت اتنين في العربية بيتكلموا عن حال البلد ... فتطفلت عليهم وقولتلهم ابتسموا انتم في بلد ديمقراطي فتعجبوا جدا من كلمتي وخافوا مني فلاحقت كلمتي هذه بهذا الكلام ... تعالوا نشوف ايه هو : يالا بينا
انتوا في بلد ديمقراطي ... فيها تنضرب وتلاقي اي واحد لابس زي ميري يبهدلك ويشتمك يبقى انت اكيد في مصر وهي دي الديمقراطية ... وفيها بتلبس احلى لبس وبتفتري على الحكومة اللي سهرانة ومعيشاك احلى عيشة وبتاكلك اكل غير ملوث ومحافظة على كل شئ حتى الشوراع مش بتكسرها ولا حاجة و وبتوفرلك انقى مياه ... وبتسهر طول الليل تحميك حتى بالامارة لو نزلت وسط البلد بليل مثلا حوالي الساعة 2 ص هتلاقي مثلا عسكري يا عيني عليه نايم على روحه وهو في خدمته قدام اي هيئة سواء بنك او اي شئ .. وغير كده بتسيبك تقول اللي في نفسك تعمل معارضة تعمل ام علي على راحتك وهي ليها اجراء تاني ... و بتوفر لكل شاب فرصة عمل وشقة علشان تسهلوا الجواز ... ولو رحت مكان زي السجل المدني مش بيطلعوا عينك ولا اي حاجة علشان تطلع ورقة رسمية ولا بيطلبوا منك فلوس ولا حاجة ... وبيحافظوا على البلد بالكليبات والاغاني قال ايه علشان ما يبقوش حرموا الشعب من حاجة ولا محتاجة ... ولا بيقفلوا مساجد ولا حاجة ... ولا بيعملوا اي حاجة تنفعك ... و كمان يا ناس بيعملوا مشاريع علشان يحافظوا على ارض البلد لكنهم بيبيعوا تراب البلد ... البلد اللي هي بلدك وبلدي وبلد الولد وولد الولد ... بالزمة بقى مش تبقى دي بلد ديمقراطي
وفي الاخر قلت كلمتين والدمعة بتنزل من عيوني :
يا شعب ياللي بتنضرب وتقول كمان
البلد........... بلدنا بقت بتاع سجان
الكلمة منك تنعدم وتنكتم وتقول كمان
حرام عليك يا شعب .. موووووت
No comments:
Post a Comment