I HEART...

Wednesday, April 23, 2008

في زنزانة 2في2


في زنزانة 2 في 2

ويا احبابنا ضي العين

مع مولانا نور العين

هي العين

جوه السجن يا ولداه

تبكي لجل المولى حارسها

هو المولى رب الكون

تبكي بحرقة لكثر ذنوببها

تبكي بشوق عالي للجنة

تبكي بفرحة للي بيخرج

من زنزانة 2 في 2

حتى الكلمة تبكي عشانها

لما تكون خارجة من قلب

ضحى

بنفسه وبامواله وباولاده

وكمان عمره

لجل ما يبقى فيه اصلاح

إيه إصلاح ؟! ـــ

اصلاحك انت وهو وهي

اصلاح بلده وبلدك

من سجان فاكر ان بصوته

يقدر يكتم صوت انسان

ضحى بعمره لجل بلاده

تعيش بامان

من ورا القضبان بيقول

انا هافضل كده علطول

لجل المولى ما يرضى عليه

ويرزقني عظم الجنان

وتبقى بلادنا بخير وامان

حكموا عليه بسبعة وخمسة

وكمان تلاتة من السنوات

بعد محاكمة عسكرية

ظالمة .. عتية

بعد 74 جلسة واانا برده

ورا القضبان

قلت ايه التهمة يا والدي

رد عليه وبصوت واطي

من غير تهمة !!ــ

كل ده يا ابن بلادي

علشان قلت بعلو الصوت

لجل بلادي ما تكون فوق

قلت انادي بالاصلاح

لكن مهما عملوا يا ابني

مش هايهزوا منا الشعرة

ولا يكسروا شجرة قوية

حط بذورها حسن البنا

لو مات فرع يطلع عشرة

ودي اركان بيعتنا عشرة

لو قتلوني

تبقى شهادة من عند الله

ودي اسمى شئ في حياتي

دايما ما اشدو بيها في دعائي

ولكن بعد ده كله يا ابني

عايزك تعرف

ان في وسط الضلمة دي هية

نور الفجر خلاص بيبان

والشمس هاتشرق من تاني

تملا الدنيا نور وامان

قلت باذن المولى يا والدي

مش هتكمل

حتى 2 في زنزانة 2 في 2

ورا قضبان ويا سجان

ولا حتى سور عالي كمان

وادي حكاية والدي يا عالم

ضحى بماله وعمره واهله

لجل ما ينشر دعوة ربه

في زنزانة 2 في 2
أنا

15 comments:

ToOoKa said...

السلام عليكم ورحمة الله وبركاته
ربنا يتقبل منك دعاءك الحلو اللى دعتهولى

وربنا يكرمك انت كمان

اما بقه بالنسبة لموضوعك
بص ياسيدى

يمكن انا مش تبع الأخوان ولا اى حزب
يعنى مش متحيزه لحد وما يهمنيش غير انى اشوف بلدى احسن بلد
بس الصراحه اللى بيحصل دا ظلم

يعنى ايه ناس تتسجن من غير تهمة
انا اتحرق دمى والله لما سمعت الخبر

وقولت عوضنا عليك يارب

مش عارفه والله الحال حيفضل كده لحد امتى؟

اتمنى انو الانسان يبطل ظلم اخوه
واتمنى انى أشوف مصر والمسلمين كلهم منتصرين قبل ما أموت

بس ربنا يمهل ولا يهمل
وان شاء الله الحق والخير هو اللى حينتصر فى الأخر

يــــــــــارب اهدينا لما تحب وترضى

تسلم ايدك
أختك توكا

wael said...

الله بجد عليك
اسمحلي ارفعلك القبعه
بجد حلوه اوي
اعجبتني
تحياتي

Anonymous said...

حبيبي يا هندي

احلى موضوع من احلى اخ انا عمري ما كنت اعرف انك موهوب للدرجه دي لكن كان الله في عون اخوانا المسجونين



انا اخوك ماجد

همس الحياه said...

الظاهر ان انا فتنى الكتير بجد كلمات جميلة وهزت كيانى من الداخل بجد بجد حلوة خالص تحياتى لك

غاوي حرية said...

السلام عليكم ... أعتذر لكم جميعا عن التأخير في الرد

توكة
*****
نعمل ايه بس يا توكه ظلم وقع علي هؤلاء الشرفاء وليس لنا ولهم الا ان نصبر وندعوا الله بان يفرج هذا الهم عن كل هؤلاء الناس وعن هذا الشعب الذي ضاقت به الارض فعلا وربنا ينتقم منك يا حسني انت واللي معاك

غاوي حرية said...

أستاذ وائل
**********
شكرا على مرورك الذي اصاب مدونتي بالسرور .. ويا ريت ما تكنش اخر زيارة ...وشكرا على اطرائك ده واهم شئ انك تكون وصلك ما تحمله من معاني
وبجد يارب تكون عجبتك

غاوي حرية said...

ماجد باشا العياطي
*****************
نورت بيتك ومطرحك واضفيت على المدونة عبقا لم ارى مثله وادخلت علي البهجة والسرور يا حبيب قلبي يا لب فؤادي يا من كان دوما معي قلبا وقالبا بحبك موووووت في الله يا قلبي .. وبعدين الموهبة دي ربا يحفظهالي وانت مكنتش تعرف .. اديك عرفت يا سيدي علشان تصدقوا بس

غاوي حرية said...

همس الحياة
********
مش فاتك كثير ولا حاجة وبعدين ده بيتكم ومطرحكم .. ويا ريت تنورونا على طول .. ونورتيني بزيارتك اما بقى حكاية الكلمات فربنا يتقبل بس الواحد حب يطلع اللي جواه في حاجة فطلعت دي ومش هتصدقي كتبتها فين .. كتبتها وانا راكب القطر ومسافر الصعيد لناس اصحابي

Hosam Yahia حسام يحيى said...

مدونه جميله يا غاوى


انا بقا صوت الحريه


هههههههههه


تحياتى لك

محاولة لكسر الصمت said...

حلو اوي الزجل ده....وان شاء الله الشمس هتشرق من تاني

غاوي حرية said...

حسام باشا
********
نورت يا ريس - صوت الحرية - طب بالله عليك علي صوتك شوية ونورت يا باشا

غاوي حرية said...

دواااير
********

نورتي يا فندم واهلا بكي في بيتك ومطرحك وان شاء الله هتشرق رغم انفهم

Anonymous said...

بجد كلام جامد جدا
وكلام اكثر من رائع
لك تحياتى واحترامى

Anonymous said...

جزاك الله كل خير على هذا المجهود يارفيقى وان شاء الله فرجوا قريييييييب
(بس بقولك اية مش شايف ان الزنزانة ضيقة شوية)ههههههههه
اخوك المصرى ميرو
الى الامام دائما يعم غاوى

paranoia,magnetic & dramatic girl said...

يانهاري انا اخر واحدة شفت الكلام ده
كلام كلنا حاسينه ومش قادرين ندفه الاحساس السيء ده عنا
تعبيرك جميل
...
عارف جملة : حبة سياسة يامامي خفت
ضحكتني اوي
:))
ربنا يسلم
كنت عاوزة اشكرك جدا علي تعليقك الاخير ورغبتك في المساعدة لعمل بانر
بس انا بحب اعمل حاجة عن نفسي وحاساها
قلي صحيح البانر اخير ده ايه رأيك فيه؟؟
احب اسمع منك طالما لك خلفية في التصميم وكده
انا عارفة انه بسيط االي انا عملاه بس هو زي ماقلتلك مني وعني ومش مهم يبقي حلو
المهم بليز قلي رأيك وتعديلاتك
هو في العموم انا كل حبة بغيره
ربنا يكرمك
.........
دودو