I HEART...

Sunday, September 9, 2007

رمضان جانا .. تعالوا نقرب


لو بصيت لنفسك.... هتلاقى ذنوب زى الجبال ...ذنوب أنت عارفها ... وذنوب عملتها ونسيتها .... وذنوب لسه مُصّر عليها.أنت بقى ناوى تخش رمضان بكل تلك الذنوب ... ناوى تصوم وأنت لسه مُصّر على المعاصى ...ناوى تصلى التراويح وأنت لسه بتعصى ربك .ربك حبيبك ... والله إنه حبيبك....أنت تحبه أليس كذلك؟؟ وهو يحبك. وأنت مازلت تصر على مبارزته بالمعاصى.....ما زلت تسمع قال الله وقال رسول الله ...وتقول أنت سمعنا وعصينا...ليه عايزه يغضب عليك .

طيب ...نويت تتوب ...أول سؤال لازم تجاوب عليه نويت تتوب من إيه ...كلنا بنعصى ربنا لكن لازم نتوب من المعاصى دى...وعشان نتوب لازم نحدد إيه هى المعاصى ؟؟؟هات ورقة وقلم...حالا الآن وأنت تقرأ هذا المقال...بسرعة ...واكتب:



ذنوبى مع ربي

..............

..............

..............

ذنوبى مع الخلق

...........

...........

...........

طب وإيه الفرق من ذنوبك مع الله وذنوبك مع الخلق؟؟؟التوبة ليها شروط...وشروطها هى:1- ندم على ما فعلته من معاصى (فى الماضى)وهو:أن تستشعر الخطأ على ما فعلته فى حق ربك .2-الإقلاع عن الذنب (فى الحاضر) وهو:أن تبتعد عن المعصية إبتعادا كليا وعدم إقترافه مرة أخرى.3-العزم على عدم العودة(فى المستقبل) وهو:النية فى القلب أنك لن تعود مرة أخرى لهذا الذنب (زى ناس تتوب فى رمضان عن الأغانى مثلا ... وإن سألته يقول لك أنا مش هسمع أغانى فى رمضان ...وطب وبعد رمضان؟؟؟

تلك الشروط إن كانت فى حق سيدك وحبيبك ومولاك وإن كانت فى حق الخلق فلها شرط رابع:4-رد المظالم إلى أهلها وهو:أنك لو أغتبت شخصا فعليك أن تستسمحه حتى يرضى ,وإن لم تقدر فأذكره بالمدح أمام الناس وخاصة من سمعوا هذه الغيبة.


برضه مش ناوى تتوب؟؟ ...هتقولى يا سيدى أنت إيش عرفك؟؟ ... هقولك إنك بتقرأ الكلام ده وكأنه مش موجه ليك .... خلى بالك الكلام ده موجه ليك وليا ولجميع الناس...لأن مفيش حد مابيعصيش ربنا.


خلى بالك...ربنا وأنت بتعصيه برضه نسبك ليه وجعلك من عباده...بس بيناديك تعالى إلي أيها العبد إسمع لسيدك وحبيبك ومولاك ...اسمع وتدبر لعل الله يتوب عليك:(قل لعبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعا) ...مهما أسرفت ومهما عصيت ربنا هيتوب عليك ... شوفت إزاى هو بيحبك؟؟؟

وأخيرا وليس آخرا .... "إن الله يفرح بتوبة العبد" هل تريد أن يفرح الله بك ...هل تريد أن يقول ربك للملائكة أشهدكم يا ملائكتى أنى أحب فلان فأحبوه...أو أشهدكم يا ملائكتى أنى أمقت فلان فامقتوه؟؟؟.


توب بقى وخش رمضان وأنت نضيف ... توب بقى ومتخليش الشيطان يسوقك ويتحكم فيك يقول لك يمينا فتذهب يمينا ويقول لك شمالا فتذهب شمالا.


متى ستفوق يا عبدالله؟؟

No comments: